Hoe deel ek die evangelie in die werksplek?

 
Hoe deel ek die evangelie in die werksplek?

Elke gelowige is geroep om die evangelie met ander te deel en aangesien, vir meeste van ons, die meeste van ons tyd by die werk gespandeer word, het ons ook die verantwoordelikheid om ons lig daar te laat skyn.  Terwyl dit waar is, laat meeste werkgewers nie hulle werknemers toe om hulle geloof vrylik te deel nie.  Dit mag daarom vir jou onmoontlik lyk om hier ‘n geleentheid te vind om Christus te verkondig, maar dit is nie.

Ons het die verantwoordelikheid as gelowiges om ons ‘here na die vlees’ te gehoorsaam (Ef. 6:5; Col 3:22).   Daarom as ons werkgewers ons nie toelaat om die evangelie direk met ander te deel nie, moet ons hulle hierin gehoorsaam.  Ons moet nooit vergeet dat ons die verantwoordelikheid het om vir ons familie te sorg nie.  Soos 1 Timoteus 5:8 ons herinner ‘Maar iemand wat vir sy eie mense, en veral sy huisgenote, nie sorg nie, het die geloof verloën en is slegter as ‘n ongelowige.’ 

Tog kan die gelowige nie die grootste deel van sy dag spandeer op so ‘n manier dat die lig van Christus uitgedoof is en waar dit nie helder kan skyn nie.  Terwyl ons ‘n verantwoordelikheid het om ons ‘here na die vlees’ te gehoorsaam, het ons nog meer die verantwoordelik om ons ‘Here na die Gees’ te verheerlik in alles wat ons doen.

 

1. Leef jou getuienis uit

Terwyl die geleentheid om vrylik oor jou geloof te praat jou miskien ontneem word, word jy nie daarvan ontneem om dit uit te leef nie.  Ons geloof moet ons lewe verander en daardie verandering moet sigbaar wees in hoe jy optree.  Daarom kan jou andersheid ‘n gulde geleentheid en manier wees waarop jy jou geloof bekendmaak (Kol. 3:17). 

a.Jou woorde

Terwyl jy verhoed mag word om die direkte benadering van evangelisasie te neem, kan niemand jou verhoed om deur jou woorde jou anderheid te getuig nie.

-    Praat anders

Die gelowige se woorde moet anders wees as die van mense van hierdie wêreld.  So behoort ons nooit skuldig te wees aan leuens nie (Spr. 6:17; Ef: 4:25).  Verder behoort ons geen vuiltaal (Ef. 4:29) of dwase, lawwe of ligsinnige woorde (Ef. 5:3) nie by gelowiges gevind word nie.  Jou woorde is ‘n getuienis van wat in jou hart aangaan (Luk. 6:45) en behoort daarom jou Christenskap te vertolk.  Inderdaad soos die apostel Paulus ons leer, ons moet ons gedagtes gevange laat neem deur gehoorsaamheid aan Christus (2 Kor.10:5) sodat ons gemoed vernuwe sal word om anders as hierdie wêreld te wees (Rom. 12:2) wat onder andere uiting sal vind in die manier waarop ons praat.

-    Skep ‘n geleentheid

Terwyl jy miskien nie direk met iemand oor die evangelie mag praat nie, kan jy wel die geleentheid skep waarin spraak hieroor in antwoord kom op iemand anders se vrae.  Die apostel Petrus het verseker baie van ‘n vyandiggesinde konteks verstaan en leer ons in 1 Petrus 3:15 ‘…heilig die Here God in julle harte en wees altyd bereid om verantwoording te doen aan elkeen wat van julle rekenskap eis omtrent die hoop wat in julle is, met sagmoedigheid en vrees’. Hierdie teks vra dat jy gereed moet wees om ‘n antwoord te gee.  Dit sluit in om geleenthede te skep om oor die Here te praat.  Iemand mag jou dalk vra of jy na werk saam met hulle iets wil gaan drink en jy kan antwoord ‘Jammer, as Christen glo ek jy mag nie dronk word van wyn nie’ of as iemand vir jou teen die einde van die week sê om jou naweek te geniet, kan jy antwoord deur te sê ‘dankie, ek sien veral uit om Sondag kerk toe te gaan’

-    Bid vir jou medewerkers

Terwyl dit belangrik is dat jy deur jou woorde teenoor ander ‘n getuie sal wees, is dit ook belangrik dat jy in jou woorde teenoor die Here vir hulle sal pleit.  Pleit by die Here vir medewerkers wat in sonde en boosheid lewe (1 Tim. 2:1).  Bid vir jou werkgewer, bid vir jou medewerkers, bid vir julle kliente en verskaffers. 

Medewerkers mag by geleentheid vrymoedigheid neem om met jou oor ‘n probleem of hartseer te gesels en dan kan jy vrymoedigheid neem om of vir hulle dan en daar te bid, of hulle te verseker dat jy vir hulle sal bid.  Dis egter belangrik dat as jy belowe het om te bid, dat jy dit sal doen (Matt. 5:37).

b.Jou rentmeesterskap

-    Die Skepping

Op een of ander manier het die meeste van ons werk iewers ‘n konneksie met God se skepping.  Of dit is dat jy vir omgewingsake werk, of behoeftiges versorg, dokumentasie druk, wetenskaplike navorsing doen of skool gee, iewers is daar ‘n manier waarop jy, nie net self die omgewing kan bewaar nie, maar ander kan help of aanmoedig om dit ook te doen.  Kom ons vergeet nie dat die Here ons opdrag gegee het om ‘na Sy beeld’ te heers oor Sy skepping nie (Gen. 1:26).  Besin die maniere waarop Sy skeppingswerk jou werk beinvloed en staan in verwondering oor Sy genade aan jou hierin, maar poog terselfdetyd om die negatiewe impak van jou werk daarop te beperk en vind maniere om dit eerder te bevorder.

-    Jou Geldbesteding

Ons praat nie hier spesifiek oor hoe jy jou eie geld besteë nie, maar hoe jy die werk se geld besteë.  Die gelowige moet homself nie skuldig maak aan enige vorm van bedrog nie (Eks. 23:8).  Verder moet ons leer om so ver moontlik spaarsamig te werk met die hulpbronne van ons werkgewer en dit nie onnodig vermors nie (Luk. 12:47-48).  Ons moet nooit vergeet dat ook daardie hulpbronne as ‘n gawe van God aan ons voorsien word nie (Jak. 1:17).

-    Jou ywer

Kom ons vergeet nie dat die Here verwag dat ons deur harde werk ons brood sal verdien nie (Ef. 4:28).  Die gelowige behoort altyd op tyd te wees (1 Tim. 6:1) en tydens sy werksure te werk asof hy vir die Here werk (Kol. 3:17).  Die verwagting is dat gelowiges daarom altyd hard sal werk en hulle beste sal lewer.  Terwyl ander lui mag wegsteek of tyd mag steel, moet gelowiges juis hierin getuig dat hulle ‘n Meester het wat hoër is as hulle werkgewers.

c. Jou Selfopoffering

Terwyl die gelowige versigtig moet wees om van sy werk ‘n afgod te maak deur homself te oorwerk, moet hy altyd bereid wees om die ‘ekstra myl’ te gaan om behulpsaam te wees, veral in tye van nood of druk. 

-    ‘n Siek medewerker

Die gelowige moet bereid wees, om sover moontlik, in te staan vir medewerkers wat siek is of afwessig is vir een of ander rede.  Ek herinner julle aan ons verantwoordelikheid om Christus se voorbeeld na te volg in hierdie geval volgens Filippense 2:3-4 wat sê ‘Moenie iets doen uit selfsug of uit ydele eer nie, maar in nederigheid moet die een die ander hoë ag as homself.  Julle moet nie elkeen na sy eie belange omsien nie, maar elkeen ook na die ander s’n’ 

-    Tye van druk

Tydens meeste mense se werk kom daar tye waar daar ekstra druk op jou geplaas word.  Soos maand of jaar einde vir iemand in finansies, of in ‘n noodgeval vir iemand in verpleging, of eksamen tye vir onderwysers.  Die gelowige moet blymoedig gewillig wees om tydens hierdie tye eksta werkdruk te aanvaar (Jak. 1:2-4).  Terwyl werksomstandighede wat konstant druk veroorsaak nie goed is vir jou fisies of geestelik nie, behoort jy bereid wees om vir tye sulke druk te hanteer as dit nodig raak.  Jou gesindheid om nie te kla nie kan ‘n goeie getuie wees van jou geloof.

 

2. Deel die evangelie

Terwyl meeste werkgewers hulle werknemers verbied om die evangelie direk met ander te deel in die werksplek is daar wel werkgewers wat dit toelaat of wat nie ‘n verbod hierop plaas nie.  In so geval behoort die gelowige vrymoedigheid te neem om sy geloof openlik te deel met ander.  Wat behoort ons benadering in so geval te wees?  (Hierdie is ook toepaslik waar bogenoemde getuienis deur dade waar jy reageer op ‘n belangstelling van hulle kant af)

a.Bid

E M Bounds maak ‘n baie belangrike stelling oor gebed as hy sê ‘Om met mense oor God te praat is ‘n belangrike ding, maar om met God oor mense te praat is selfs belangriker’.  Die apostle Paulus benadruk die belangrikheid dat gelowiges moet bid vir ‘n oop deur en oop harte om die verborgenheid van Christus te kan deel (Kol. 4:2-3).  Tensy die hart van die ongelowige oopmaak om die evangelie te ontvang sal hulle dit nooit ontvang nie.  Daarom moet ons by Hom pleit om deur Sy Gees, die persoon ontvanklik te maak vir die Woord.  Verder het ons die Heilige Gees nodig om ons te lei en te wys hoe om die evangelie te deel met die spesifieke persoon.

b.Soek ‘n geleentheid

As die apostel Petrus in 1 Petrus 3:15 sê ‘wees altyd bereid (gereed) om verantwoording te doe naan elkeen wat van julle rekenskap eis omtrent die hoop wat in julle is, met sagmoedigheid en vrees’, beteken dit nie dat ons altyd moet wag vir ‘n geleentheid nie, maar dit beteken ook dat ons self ‘n geleentheid kan skep of aangryp.  Sy punt is dat elke geleentheid kan ‘n geleentheid wees om te getuig van ons hoop en ons moet bereid wees om daardie geleenthede aan te gryp wanneer hulle na vore kom.  In werklikheid is dit moontlik om enige gesprek te draai tot ‘n geleentheid om oor die Here te praat en so te getuig.  Terwyl ek nie daardeur sê ons behoort elke omblik by die werk ‘n evangeliesasie oomblik te maak nie, behoort ons, waar dit toelaatbaar is, minstens gereeld sulke geleenthede skep en gebruik tot Sy eer.

c.       Deel die evangelie

As die geleentheid homself voordoen moet die gelowige dit altyd aangryp om die evangelie met ander te deel.  Die gelowige het nodig om die tyd uit te koop deur in wysheid te wandel (Kol. 4:5).  Om die evangelie te deel beteken nie ons hoef hard en kras te wees nie, inteendeel, veral in die werksplek sal ek julle aanmoedig om dit met sagmoedigheid te doen (Gal. 6:1). Dit is ook belangrik om geduld aan die dag te lê en nie radikale onmiddelike bekering in elke geval te verwag nie (1 Kor. 3:6-7)

 

Terwyl dit dag vir dag moeiliker word om geleenthede te kry om die evangelie te deel en dit veral in die werksplek, moet die gelowige wys en kundig wees om sy getuienis uit te leef en geleenthede te skep om te getuig van die hoop wat in ons is.  Die feit dat werkgewers ons verbied om die evangelie direk te verkondig ontneem ons nie van ons verantwoordelikheid aan die Here om elke geleentheid te gebruik om Hom te eer en Sy Naam te verkondig nie.  Die opdrag om te getuig word nie net aan sekere gelowiges of vir sekere tye gegee nie, maar vir alle gelowiges by elke geleentheid.

Terwyl jou werk noodsaaklik is en jy daarom jou ‘here na die vlees’ moet eer, moet jy altyd onthou dat jy nie daardeur die ‘Here van jou Gees’ moet verontagsaam nie.  Wees ‘n lig deur jou dade, en waar die geleentheid homself voordoen, gryp dit aan om ook ‘n lig te wees deur die Woord duidelik in liefde te verkondig.  Laat ons egter nooit vergeet dat ons evangelisasie van ander begin in die hart nie, ‘n hart wat besorg is oor ‘n verlore gaande wêreld en ‘n hart wat meer besorg is oor die eer van onse Here.  Daarom wil ek julle aanmoedig om eers met God te praat oor mense, voordat julle met mense gesels oor God.

 

ds. Leon Harmse

Leraar van Sunwardpark Baptistekerk